UN AUTÉNTICO GRIOT NO COLE: BONIFACE OFOGO . LENDO LIBROS ESCRITOS NO AIRE

     Hoxe,o noso cole encheuse dunha enerxía especial, un aire africano que chegou da man dun auténtico griot, un contador de contos nacido en Camerún que nos visitou para contaxiarnos a súa enerxía e para deleitarnos cos seus relatos cheos de ensinanzas. As súas palabras foron levándonos a mundos habitados por leóns, tartarugas e elefantes, a lugares lonxanos onde soan djembés, korás e balafóns, onde os nenos e nenas aprenden a respectar a natureza e conviven en armonía con ela tomando boa nota das súas ensinanzas. Boniface narra, canta, interactúa co público dun xeito natural, vai cambiando a entonación para facernos sentir emocións diversas desde a alegría e o humor ata a sorpresa e o medo, tanto pode mostrarnos como é o froito do baobab como ensinarnos a falar yambassa, a súa lingua materna.

   Que importante é escoitar a persoas coma el! Que deleite presenciar a súa posta en escea! Escoitar contos, mergullarse nos relatos de diferentes culturas é a mellor maneira de abrir os ollos e de expandir a mirada porque non só hai que ver, hai que aprender a mirar, non só hai que oír, hay que aprender a escoitar.

   O noso Proxecto Blablalandia incide na importancia da palabra. Por iso ter un griot aquí é algo insuperable. Podería estar todo o día falando de Boniface, dos contos africanos, do poder da palabra e a importancia de compartir relatos pero vou, simplemente, recoller algúns extractos do libro "Unha vida de conto" de Boniface Ofogo:

• Griot é unha palabra wólof que significa paxaro voador. É un mestre da palabra, o depositario da memoria colectiva da tribu.
• Por medio da palabra que me transmitiron os sabios da tribu, percorro o mundo construíndo pontes invisibles pero indestructibles. son un diplomático dos contos.
• A persoa que ensina a ler e escribir a un neno ou un adulto estalle abrindo os ollos a un mundo novo.
• A miña traxectoria persoal e académica  demostra que "oralidade" e "escritura" son complementarias. Para min, o amor e a práctica da oralidade agudizaron e prepararon o terreo á miña posterior devoción polos libros e pola lectura.
•  Grazas aos contos orales que eu levaba escoitando desde a miña máis tenra infancia, teño a imaxinación moi entrenada. Digamos que, sen darme conta, toda a vida estivera lendo libros escritos no aire pola imaxinación popular.
• É máis fácil transmitir unha mensaxe a través do conto que a través de longas charlas ou conferencias.
• Enriquecendo o imaxinario das persoas, podemos ampliar o seu horizonte vital e mellorar a súa percepción do mundo .      

      Despois desta introducción, que me parecía importante facer, imos ao que seguramente estades esperando ver: as imaxes que demostran que a xornada de hoxe foi insuperable, que vivimos emocións intensas, que pasamos momentos tremendamente divertidos e que nos deixamos transportar polas palabras de Boni que nos fixo soñar. Se vos fixades nas caras dos peques, penso que pouco máis poderíamos dicir.  Unha experiencia inesquecible!

                             

                                        
                                       
                                        
                                        

                                        

                                        
                                        
                                       
                                        

  Boniface adicounos moito tempo, non só contándonos os seus contos, senón cantando connosco "Olelé Moliba Makassi" (que nos rechifla na Pementeira), ensinándonos a falar yambassa e firmándonos exemplares dos seus libros. Visitou as aulas de infantil, comprobou como nos gusta África, e fíxonos sentir moi especiais.

                                        

                                             

Se queredes saber máis cousiñas de Boni podedes visitar a súa web clicando na imaxe:

GRAZAS, BONI E EDITORIAL KALANDRAKA, POR TRAERNOS HISTORIAS, POR CONTAXIARNOS DE ALEGRÍA, POR COMPARTIR IMAXINACIÓN, POR FACERNOS VIAXAR POLO MARABILLOSO CONTINENTE AFRICANO AO RITMO DAS PALABRAS, E A MÚSICA!!! GRAZAS E ESPERO QUE POIDAMOS REPETIR MOITAS EXPERIENCIAS ASÍ DE ENRIQUECEDORAS!