Estamos aprendendo tantas cousas sobre as aves e facendo tantas tarefas diferentes que, ultimamente, non compartín imaxes das nosas sesións de ioga. Pero ademais de coidar e cultivar a mente, tamén estamos coidando o noso corpo facendo exercicio e o noso espíritu traballando a calma, a concentración, o autocontrol, a conexión co noso interior.
O ioga é unha disciplina holística polo tanto pretende traballar co corpo, a mente e o espíritu mediante posturas físicas, a respiración e a meditación. Hai días que as sesións de ioga son máis complicadas porque costa centrarse en sí mesmo, observar o propio corpo, manter a concentración, esforzarse nunha asana e ter paciencia, e eses días precisamente é cando máis necesitamos facer ioga. Outros días as sesión flúen con máis naturalidade e percíbese que as asanas saen mellor e o ambiente é agradable, seguro e estimulante. Pero así é a vida en xeral, cada día ten os seus retos e as súas gratificacións e tamén imos aprendendo a sufear nestas ondas que nos trae o día a día.
Cada venres temos o noso "momento iogui" e aquí van as probas de que imos mellorando, avanzando, perfeccionando asanas, conectando un pouquiño máis co noso ser e superando pequenas frustracións.
E para rematar con esta entrada sobre vida sana, hai que dicir que a alimentación tamén é moi importante, como é obvio. Esta semana tivemos a oportunidade de degustar un producto do noso mar, porque Galicia ten a sorte de contar con moitos kilómetros de costa que nos proporcionan alimentos deliciosos e variados. O xoves, o alumnado do Rosalía tivo a sorte de degustar unha tapiña de mexillón ben rico porque "Galicia sabe amar". Varios/as pementeiros/as se animaron a probalo e ise foi o primeiro premio, o segundo foi unha pulseira. Bravo!
