QUENTANDO MOTORES PARA O FESTIVAL DE FIN DE CURSO

       Empeza o mes de xuño e xa toca planificar o fin de curso, preparar bolsas e portadas de traballos e, sobre todo, empezar os ensaios da nosa actuación de Fin de Curso que promete ser electrizante, alucinante e ben, ben movida. Como xa sabedes os que que léchedes a nota de hoxe, os nenos e nenas de infantil (coas súas mestras como ben sendo habitual) van bailar un rock´n´roll dos oitenta que non vos vai deixar indiferentes. Seguro que non aguantades nas cadeiras e tamén vos animades a bailar.

      O festival será o día 21, aínda non está concretado o horario así que iremos concretando en canto esté todo decidido e organizado. En principio, como xa é habitual, infantil actuará en primeiro lugar. Como facemos cada ano, as camisetas van ser iguais para todo o grupo, xa estamos as mestras no proceso de "diseño" e  encarga, e en canto estén listas levaranas para a casa. O resto do "look rockeiro" deixámolo á vosa elección, o que nos gustaría é que todos/as leváramos a vestimenta dentro dun código de tres cores: vermello, negro e branco.

     Todos/as temos imaxes nas nosas cabezas de famosos/as rockeiros con indumentarias ou accesorios que xa os definen e os fan inconfundibles, por iso cada un de vós pode buscar inspiración nesesídolos da música, rock, heavy ou pop-rock dos anos 80 en adiante. Podedes mirar imaxes en internet ou deixarvos levar pola vosa imaxinación, porque seguro que se vos ocurren cousas divertidas. É importante que teñades en conta que imos bailar e, polo tanto, non é aconsellable que traian accesorios que lle impidan moverse con comodidade e soltura, que lles caian ao chan ou que non lles permitan ver ben. 

    Non é necesario complicarse moito a vida, como vedes con esas tres cores, vermello, negro e branco, saen combinacións moi vistosas e non moi complexas; leggins, tutús, tenis ou botíns, algunha cadea, guantes, cinturóns e bandanas, pelos cardados ou de punta... en fin hai multitude de opcións e, obviamente, os nenos e nenas de infantil van estar moi divertidos/as sen dúbida.

    Hoxe fixemos un primeiro ensaio do baile e realmente foi fantástico. Metéronse rapidísimamente na canción, saltaron e rockanrollearon xenial, botamos unhas risas e, a verdade, é que os vin moi motivados e con moitas ganas de demostrar que queren ser artistas. Chamoume a atención que a primeira vez que lles presento a coreografía e que eles/as a fan xa a colleran tan ben, e se meteran tanto no papel. A verdade é que o fixeron moi ben e cos días que temos por diante, se conseguimos manter esa ilusión e un pouco de concentración, podemos esperar unha actuación memorable no festival.

     Iremos informando das novedades. Bo fin de semana!

25 DE MAIO: DÍA DE ÁFRICA.

    Hoxe, 25 de maio, celebramos o Día de África, un día cheo de simbolismo e de valor social xa que este continente cheo de maxia, de cultura, de arte, de ritmo desbordante, de cores vivas, de paisaxes exuberantes, de fauna única, de fermosa luz, de xentes diversas, de misticismo, de símbolos cargados de misterio (podería seguir e non parar), como dicía, este continente único é o berce da humanidade e de aí, desas terras impresionantes saíron os primeiros seres humanos para ir poboando os demáis continentes do planeta.

     Como ben di Eduardo Galeano  "desde África emprenderon os nosos avós a conquista do planeta. Os diversos camiños fundaron os diversos destinos, e o sol ocupouse do reparto das cores. Por iso todos somos africanos emigrados".

       Supoño que, a estas alturas, xa sabedes todos da miña profunda admiración por África (aínda que coñezo unha parte moi pequena deste vasto continente), estaredes fartos de escoitar que cando se viaxa a África, todo cambia e deixas de ser a persoa que antes eras, África déixache unha marca no corazón que non se borra, crea unha necesidade de volver que é difícil de explicar. Eu, desde a aula, sempre intento abrir os ollos dos máis pequenos ás riquezas do mundo, tanto a nivel de elementos naturais como no relativo á variedade cultural e artística. E neste trimestre estamos totalmente mergullados no noso continente veciño que nos namora coa magnética historia de Kirikou, que nos fai cantar e bailar con Olelé Moliba Makassi e que nos leva a empregar as cores vivas dos atardeceres na sabana.

Aprendemos moitísimas cousas sobre África e fixemos multitude de actividades ao longo deste trimestre. Aquí vos deixo moitas imaxes, exemplos de tarefas, e un vídeo divertido tocando instrumentos musicais, cantando e bailando.