Levamos xa uns días de curso e estamos moi metidos no Proxecto Pharos. Estamos organizando o noso recuncho luminoso con moitas aportacións que están chegando desde as vosas casas. Moitas grazas por esa participación, xa que os nenos e nenas síntense moi ben cando traen algo e son os protagonistas nese momento. A partir de todo isto, estou xa elaborando algunhas tarefas impresas, preparando actividades e planificando aprendizaxes.
Xa contamos varios contos e miramos con detalle algúns dos libros e pasamos bos momentos coas historias narradas pero tamén lendo a escuras, eso sí empregando a linterna porque se non non podíamos ver nada.
Estivemos comprobando que a LUZ e a SOMBRA van xuntiñas da man. Estamos intentando avanzar na expresión oral tratando de explicar cousas, de construír defininicións, de aportar información concreta sobre un tema. É dicir, estamos iniciándonos no emprego do método científico facendo observacións, rexistrando o que observamos e sacando unhas conclusións que temos que transmitir. Para entender o que é a sombra fixemos varias experiencias para poder extraer conclusións. E despois escribimos na pizarra o que aprendemos.
Tamén estivemos lendo cousas sobre o sol e aprendemos que como a Terra está dando voltas (rotación) ás veces recibe a luz do sol nun lado e outras noutro lado. A Terra tarda un día en dar unha volta completa sobre si mesma, e así ocurre que cando a luz do sol está dando directamente sobre nós é de día pero ao ir dando a volta, esa zona xa non recibe luz e queda en sombra, polo que é de noite. Cando é de día en Europa é de noite e América, e viceversa.
Estivemos aprendendo que é un eclipse, porque despois da experiencia do mes de agosto, parecía que non tiñan moi claro o que pasara realmente. Así que propuxen o primeiro Reto de Investigación: preguntar na casa, investigar, que é un eclipse, por qué quedamos a escuras. teño que dicir que varios nenos e nenas se acordaron de preguntar e ao día seguinte explicáronme que a lúa se puxo diante do sol, tapouno e por iso non había luz.
Empezamos a facer algunha actividade impresa (aínda que está costando traballo escoitar, atender, e realizar as tarefas e realmente imos moi despaciño porque teño que repetir moito, volver a explicar, repetir as indicacións).
E hoxe deixei unha sorpresa na aula con toda a ilusión de que lles gustara aosnenos e nenas, pero ninguén se dou conta de que xa non estaba o castelo do curso pasado e no seu lugar había esto...
UNHA MESA DE LUZ!
Ao final, como nin conta se deron, tiven que mostrarlla eu. Estes pementeirose pementeiras están un pouquiño alterados e iso fai que non observen, que non escoiten e non presten atención na aula. pero, en fin, o importante é que esta fantástica mesa de luz vainos dar moito xogo no prosecto deste ano, ou iso espero eu.
Seguro que cada día imos conceguindo un pouquiño máis de atención, un pouquiño máis de responsabilidade e ganas de aprender, un pouquiño máis de esforzo e, sobre todo, unhas pouquiñas ganas de disfrutar xuntos/as neste grupo respectando as normas, tratando ben aos compañeiros/as, e escoitando ás profes. Estamos creando un fermoso "Farocuncho luminoso" que nos debería levar a aprendizaxes importantes e interesantes. A ver se o conseguimos entre todos/as!
Que vos está parecendo o que imos facendo?
