IOGA E VIAXES

    Este venres 18 de setembro realizamos a segunda sesión de ioga e foi moi productiva. Houbo máis concentración e esforzo que na primeira. xa sabemos que o corpo non está todos os días igual e iso é lóxico. Hai asanas que un día non saen moi ben e ao seguinte saen xenial. Nas posturas de equilibrio, por exemplo, en ocasións parece que non hai maneira de logralas e noutras ocasións o noso corpo parece ter unha estabilidade inusitada. Pero o que máis me gusta ver é se aumenta a capacidade de concentración, escoita e esforzo porque iso vale non só para oioga senón para todas as actividades do día a día. Así que hoxe temos que valorar que a sesión foi moi positiva. Teño que seguir insistindo en intentar estirar músculos e articulacións (e certamente hai momentos en que temos que "recolocarnos" para non ter posicións que poden facernos dano) pero o importante é ir avanzando, respirando profundo, logrando a calma mental, e mellorando a postura.

   Nesta sesión traballamos a posición da cobra (bhujangasana) e do can boca arriba (urdhva mukha svanasana) principalmente.

                                      
                                       
                                       
                                       

                                         

                                         

                                       

                                       

 E despois da sesión de ioga fixemos algo moi interesante relacionado coa viaxe que fixo Ander a Disneyland París. Pola mañán, cando chegou ao cole, mostrounos unhas fotos superchulas nas que está él con Spiderman, Black Panther , Goofy e tamén diante do castelo da Bela Dormente. Ander estaba emocionado e non me cabe dúbida de que esta viaxe foi tremendamente gratificante para el e a súa familia. Como me gusta cando traen fotos de viaxes porque sempre as aproveitamos para compartir emocións e, tamén, para aprender algo novo.

   Pois ben, en relación con ese castelo tan representativo de Disneyland París, conteilles aos nenos e nenas que cando Disney buscaba inspiración para representar como podía ser o castelo da Bela Dormente atopou en Baviera, no alto dunha montaña que contempla o Lago Starnberg, o castelo máis famoso do mundo, mandado construir polo Rei Luis II de Baviera, primo da archicoñecida Sissi, emperatriz de Austria. Este rei que tivo unha vida atormentada foi coñecido como "o rei tolo" e tamén,"o rei de conto de fadas". Eu tiven  a sorte de visitar este castelo de Neuschwanstein e realmente parece sacado dun conto. Pois ben o castelo da Bela Dormente está inspirado nesta construción bávara. 

Como vedes sempre podemos aprender algo cando viaxamos.

Grazas, Ander, por traernos estas fotos tan divertidas!

IOGA E ANIVERSARIO

    O pasado venres tivemos a nosa primeira sesión de ioga do novo curso escolar. Estivemos recordando asanas y procurando retomar hábitos: estirar ben todos os músculos e as articulacións e intentar concentrarnos nas diferentes posicións sen prisas e sen xogar. Iso é o máis difícil, claro, porque as ganas de xogar están sempre moi presentes como é lóxico e normal. Así que imos compaxinando ambas cousas: concentración nas asanas e un pouco de xogo para relaxar , rir un pouco e poder continuar. En xeral estou vendo que saben facer ben varias asanas, que teñen capacidade para facelas e que moitas veces costa é prestar atención e intentalo.

  E o martes tocou celebrar outro aniversario, nesta ocasión o de Dylan que, como fai un par de día Daniela, estaba moi contento de ser o protagonista do día, de apagar as candeas, escoitar a canción e compartir uns pasteliños de chocolate cos compañeiros e compañeiras.