Non estábamos moi seguros pero finalmente hoxe tivemos unha sorpresa. A verdade é que algunha esperanza de que viñera o coelliño de Pascua tiñamos, xa que onte os nenos da aula da profe Eva atoparon pelos de coello no patio pero hoxe non escoitabamos ningún ruido nin nada e pensamos que igual non puidera vir. Cando estabamos merendando fóra pasou un helicóptero pareceunos ver unhas orellas de coello pola ventaniña pero como ía bastante alto non distinguíamos moi ben e ao mellor era o piloto que tiña unhas orellas moi grandes. Pero o caso é que despois da merenda empezamos a escoitar alboroto e vimos que empezaban a sairtodos os nenos e nenas correndo a buscar ovos de chocolate, así que, como imaxinaredes, os pementeiros/as non ían ser menos e sairon como chispas. Eu o único que vos digo é que non sei por qué, pero de súpeto viñeron á miña mente imaxes do San Fermín.
E, por suposto, hoxe era o día de entregar traballos e notas. Todos os nenos e nenas tiñan ilusión por levar as súas bolsas a casa para mostrarvos unha parte do traballo do trimestre. Espero que as mamás e papás recibírades con ilusión todo o que levaban e que valoredes moito os esforzos feitos nestes meses de actividade no cole.
Todos os nenos e nenas fixeron progresos e ainda que tivésemos algún día máis complicado con conflictos concretos (que me encantaría que non existiran, claro) tamén é certo que houbo moitas experiencias interesantes, actividades variadas que nos fixeron pensar, lecturas emocionantes, música que nos fixo sentir emocións, viaxes imaxinarios e mil cousas tremendamente positivas. Quero felicitar a todos os nenos e nenas que se esforzaron, que puxeron os seus cerebros a pensar, que quixeron participar e disfrutar no cole, que bailaron e seguiron o ritmo, que quixeron xogar en equipo, que miraron os libros con ollos cheos de curiosidade, que pintaron empregando as cores con emoción, que aplaudiron os contos que lles lin e reflexionaron sobre os temas dos que falamos cada día. O trimestre tivo algunhas pequenas interrupcións e quizá a situación que esaos vivindo dificultou algunhas dinámicas no cole pero a verdade é que foi un trimestre intenso do que podemos todos aprender moito.
Espero que voltemos cheos de ganas de seguir investigando e aprendendo xuntos.Disfrutade moito da Pascua!!!!
