FOLIADA NA PEMENTEIRA

    Onte, venres 3 de xuño, foi un día grande na Pementeira. Tiñamos programada a visita de Vanessa, do CIM Terras de Iria, que quería falar connosco sobre o noso proxecto "Musiqueando" e, en concreto, sobre a actividade que fixemos en torno á música galega en xeral e a gaiteira Cristina Pato en concreto.

   Ao longo do curso, con este proxecto centrado na música, comprobamos a aplastante presenza dos homes no mundo das artes. Coñecemos moitos compositores de música clásica e cantantes de todas as épocas e estilos. Facilmente, en calqueira investigación que facíamos ou calqueira composición ou canción que escoitábamos  por primeira vez ou que xa coñecíamos con anterioridade, xurdía un home ou varios. Sin embargo, cando eu preguntaba sobre mulleres compositoras, cantantes, directoras de orquesta ou instrumentistas, non había moitas respostas. Certamente, si nos paramos a pensar en todos os músicos que admiramos é evidente que a hai moitos máis homes que mulleres. Para nós, os adultos, entender que durante séculos as mulleres estiveron relegadas ao ámbito familiar e que ter presenza e relevancia social era un auténtico reto para elas, pode resultar sinxelo; pero para os máis pequenos iso non é tan evidente e por iso tratamos de explicarlles como foi cambiando esta situación co paso dos anos.

    Cando Vanessa nos visitou a primeira vez e nos mostrou o vídeo sobre mulleres da comarca de Padrón, xurdeu a posibilidade de facer algunha actividade sobre unha muller que destacase nesta parcela da música galega e que ela nos visitase para ver o resultado final e contarlle como fixemos o traballo. Así que era o momento preciso para facer fincapé nas mulleres que tamén destacan no eido da música. E  como nos mergullamos na música galega, empezamos a investigar sobre as mulleres gaiteiras e coñecimos a Áurea Rodríguez, Cristina Pato e Susana Seivane.  

   Antes de que chegara Vanessa, preparamos unha pequena exposición de libros que teñan como protagonistas ás mulleres, e clasificalos partindo das principais características desas nenas e mulleres protagonistas. Tamén comprobamos que si quitamos os libros de princesas (que non teñen moita presenza na Pementeira e non son os que nos dan a imaxe máis actual e intelectual da muller) non temos demasiados libros que nos falen de mulleres interesantes, intelixentes, con personalidade e con iniciativa.

    Colocamos un par de mesas na aula, buscamos libros e analizamos as características das mulleres protagonistas para escribir unhas tarxetas clasificadoras.

   Cando xa tiñamos os nosos libros organizados, chegou Vanessa pero a sorpresa foi que viña acompañada de Isabel, directora do CIM e a concelleira de festas de Padrón, Carmiña, pero cando estabamos empezando a falar con elas e a mostrarlle os nosos libros de mulleres, levamos outra sorpresa porque entraron pola porta unha gaiteira, unha tamborileira e un pandereteiro (que tamén é alumno do noso cole). E, claro, así foi como empezou toda unha foliada. Paula, Andrea e Jose animaron a nosa xornada do venres da mellor maneira posible: con música en directo maxistralmente tocada. ¡Qué pracer escoitalos!

    

   Clara explicounos as partes da gaita e despois catro mulleres valentes e artistas arrancáronse a bailar.

   A continuación falamos de Cristina Pato, explicámoslle como traballamos en equipo, cada día un pouco, para elaborar o noso mural sobre a famosa gaiteira, a primeira muller en España en gravar un disco como gaiteira en solitario, o disco Tolemia, e que agora traballa en New York como docente e tamén acaba de publicar o seu primeiro libro. A verdade é que as pementeiras e pementeiros tiñan tantas ganas de mostrar todo o que sabían e de falar do que facemos na aula e de bailar e de facer ioga e de ser protagonistas que a conversación foi un pouco desorganizada, falaron de Cristina Pato, doutras mulleres importantes (aínda que non foran artistas), dos bits de intelixencia, de viaxes polo mundo, da Raíña da noite, de Kirikú e das Tanxugueiras por suposto, en fin, alí todo tiña cabida. As nosas invitadas fixéronlles algunhas preguntas sobre o traballo, como fixeran a cor do fondo do mural, que significado tiña esa cor, que foi o que máis lle gustou do proxecto, si lles gustaba a música de Cristina Pato, falamos dos traxes tradicionais, de cantos anos hai que practicar para tocar ben un instrumento... en fin, a conversa dou para moito pero tivemos tamén tempo de cantar e bailar xuntos porque os venres son días de foliada, verdade?

    Os pementeiros e pementeiras estaban moi contentos porque lles encantan as visitas e tiñan moitas ganas de volver a  ver a Vanessa, ademais tiveron oportunidade de falar e de mostrar o que saben e iso encántalles, bailaron, cantaron e sentíronse protagonistas co cal a xornada para elas/es foi perfecta. Tamén estaban un tanto nerviosos pero penso que conseguimos máis ou menos salvar a actividade e disfrutala que era o que eu pretendía.

   ¡Mil grazas a Vanessa e Isabel do CIM, a Carmiña, Andrea, Paula e Jose! Un privilexio para nós que nos visitarades, que escoitarades con tanta atención e interese o que as pementeiras e pementeiros querían contar, que valoredes tanto o noso traballo no cole (para os nenos/as é moi importante comprobar que todo o que estamos a facer diariamente ten valor e sentido) e que nos adicárades unhas palabras tan bonitas antes de marchar. ¡Así dá gusto rematar unha semana!