PRIMEIRA SEMANA DE COLE

   Rematamos a nosa primeira semana do curso escolar 2023-24. Estamos retomando as actividades habituais, que xa tiñamos como rutinas o curso pasado: facer o panel (pasar lista), cantar e bailar, contar contos, xogar nos recunchos, facer puzles, practicar ioga, debuxar e pintar...

   Ata o de agora non estamos introducindo moitas novedades xa que  acabamos de chegar das vacacións de verán e queremos volver a adaptarnos aos horarios (hai que madrugar e activarse para facer moitas cousas no cole), volver a interiorizar as rutinas e respectar os turnos (que quizá é o que máis costa, xa que todos/as queren atención inmediata, queren ser protagonistas, e queren facer as cousas ao seu xeito e no momento que consideran oportuno para cada un deles o cal nunha aula tan numerosas é bastante complicado porque hai que ter ben organizados os tempos e os espazos) e retomar diferentes tarefas que, probablemente e como é lóxico, se esqueceron un pouco durante o verán.

    Todos/as están contentos de verse, están relaxados/as na aula porque se sinten seguros e xa non son os pequeniños de apenas 3 anos que chegaron fai un ano, están faladores e participativos/as, recordan moitas cousas do curso pasado e iso é xenial, pídenme cancións ou contos determinados, están desexando buscar as pistas para averiguar o tema do proxecto, queren levar cousas para a casa coma antes... En fin, que o inicio do curso está rodando con naturalidade.

  Nesta semana houbo moitas actividades diversas:

   1.- Cantamos e bailamos para iniciar a xornada con enerxía e boas vibracións.

    2.- Fixemos o panel (aínda  non temos encargados/as -exploradores/as- xa que primeiro temos que descubrir o tema do proxecto, pero hai moitos nenos e nenas que queren pasar lista e recordan perfectamente todo o proceso).

    3.- Fixemos puzles e xogamos nos recunchos.

   4.- Iniciamos as sesións semanais de ioga (costou un pouquiño estirar músculos pero  imos por bo camiño e xa vemos algunhas asanas moi ben realizadas):

       5.- Pintamos con acuarela:

        6.- Disfrutamos da biblioteca de aula:

     7.- Coñecemos a dúas novas amigas: unha é unha pementeira chamada Maia que se incorporou a este grupo para disfrutar deste curso escolar chegada desde unha escola unitaria . Maia enseguida se integrou no grupo con toda facilidade e coa súa propia personalidade sen problemas para ir asumindo as normas e rutinas da aula. Foi moi ben acollida por todos/as, con toda a normalidade, e ela tamén se mostra moi relaxada e particpativa na súa nova familia escolar.

        Pero, por outra banda, temos outra nova amiga na escola que chegou dun lugar un pouco máis lonxano que Maia, de Escocia. É Bonnie, a vaca peluda das Highlands, as Terras Altas escocesas. Bonnie é moi peluda porque nas Highlands vai moito frío, é moi amorosa e suave e di MOOOO! en gaélico. Todos os pementeiros/as están encantados de ter aquí a Bonnie que pronto visitará as vosas casas como fixo o noso querido Galopín. Para coñecer ben a Bonnie, lemos a historia dunha amiguiña súa que se chama Hettie.

     E aínda fixemos algunhas cousiñas máis pero xa seguiremos informando, Para esta primeira semana de toma de contacto, de volver ao cole e reencontrse con compañeiros/as e profes, a cousa estivo moi ben e fixemos un montón de cousas.

¡BO FIN DE SEMANA!