O remate do trimestre estivo cheo de actividades de todo tipo . Agora penso que xa na casa tivéchedes ocasión de ver varias delas, pero aínda así aquí vou compartir moitas imaxes xa que sempre é fermosos ver aos peques concentrados nas súas tarefas, demostrando as súas habilidades.
A decoración das bolsas leva o seu tempo porque temos que pintar o fondo e despois ir pegando diferentes elementos para chegar a realizar a idea planificada previamente. Os pementeiros e pementeiras traballaron moito e eu creo que o resultado foi realmente bo.
E ademais de preparar as nosas bolsas, tamén tivemos que facer as portadas para o caderniño de actividades impresas deste primeiro trimestre.
E aínda tivemos tempo de facer algunhas outras cousiñas: actividades de conteo empregando o ábaco e representando cantidades nunha gráfica ou diagrama de barras (que nos permite, cun simple vistazo, comprobar que elemento dun conxunto é o máis ou menos numeroso).
Tamén fixemos unha última tarefa do proxecto traballando vocabulario, lecto-escritura e practicando habilidades de motricidade fina como o recortado. Comprobamos de xeito práctico e vivencial o grande que é un peixe Lúa que pode medir 3 metros de lonxitude, que veñen sendo máis ou menos 3 nenos/as. Miramos unha vez máis os libros do mar, un pouco como despedida xa que, á volta das vacacións, seguiremos explorando e investigando da man de julio Verne e as súas obras pero deixaremos 20.000 Leguas de viaxe submarino para introducirnos nas profundidades de... ¡Xa veremos!
E aínda tivemos tempo de engadir outras tres palabras novas ao noso diccionario audiovisual: nesta ocasión Irea. Antón e Noel animáronse a definir ESPIRÁCULO; SARGAZO E ESCUALO.
Como vedes, quedaran cousiñas sen compartir no blog pero penso que agora xa está máis ou menos todo e só nos queda mostrarvos a divertida celebración de Nadal que tivo lugar o xoves 21 de decembro. Pronto a poderedes ver.
No hay comentarios:
Publicar un comentario