AVIFAUNA , HORTA E UN SUPERHEROE DA SOLIDARIEDADE

     O luns tivemos unha interesante presentación na Pementeira xa que Irea tivo a gran sorte de visitar Avifauna (https://www.avifauna.net/) un Parque Ornitolóxico que se encontra en Lugo e trouxo moitas fotos e anécdotas divertidas. Puxemos as imaxes na pantalla e ela foinos explicando as aves que viros e como mamá lle sacaba sempre unha foto ao cartel explicativo e despois ao paxaro. A verdade é que viron aves moi interesantes e moi fermosas, algunhas moi coñecidas, outras con características máis peculiares, un ibis escarlata, un pavo real branco, guacamayos de cores brillantes, un pavo real que parecía que ía desplegar a cola pero en realidade estaba despiollándose, un aguia que lle quería peteirar o dedo, un buitre leonado, un bufo, uns paxariños que lle repetían todo... En fin, que nos encantou escoitar a Irea e ver esas imaxes. Qué fantástica experiencia e que actividade tan interesante para todos os nenos e nenas en xeral, e para  este grupiño que está tan mergullado no Proxecto Plumas.

GRAZAS, IREA, POR CONTARNOS TANTAS COUSAS!

   A ver se algunha outra pementeira, ou pementeiro, se animan a visitar Avifauna e traer novas historias para os amiguetes!

    E onte mércores tamén tivemos unha actividade moi divertida: visitar a horta e plantar algunhas verduriñas!

      Tanto o profe José María como Jose, de Mans Unidas, estiveron explicándonos moitas cousas sobre as plantas, mostráronnos como son as raíces (por onde as plantas absorven auga e nutrientes), explicáronnos que as follas son as partes das plantas que normalmente comemos pero tamén podemos comer a flor, como no caso da coliflor, ou as sementes como por exemplo as noces, améndoas e cacahuetes. 

      A continuación fomos plantar repolo. Había dous tipos de repolo, de folla lisa e de folla rizada (kale). Para plantar tivemos que traballar en equipo, facer buratiños na terra, colocar a plantiña, tapar o burato, botar abono... 

    Jose tamén recordounos o importantes que son as miñocas para a terra. Xa faláramos deste tema o curso pasado, concretamente falando do Río Nilo e do fértil que era Exipto grazas ás crecidas deste río, explicamos que o feito de que alí houbese moitas miñocas facía que o solo fose aínda máis fértil xa que fan túneles polos que circula o aire e a auga pero, máis importante aínda, fabrican o humus de lombriz (comen restos orgánicos e mesmo metais que haxa no terreo e expúlsanos convertidos nese humus que abona a terra). Pero teño que dicir que os pementeiros/as non parecían recordalo, así que a visita de Jose serviunos para repasar contidos dos que falamos noutros momentos. 

    Tamén vimos bichos bola e ata unha araña saltadora. Jose contounos que todos os bichiños que vemos pola terra son moi importantes e nos indican que o solo está san e é fértil e que non debemos matalos. Outra cousa que nos contou é que o camelio é unha planta da familia do té, fixádevos qué curioso!

           
 

           

                  

                    

    Por último xa, hoxe xoves para poñer un peche á actividade da horta que organiza a ONG Manos Unidas, recibimos na Pementeira a Miriam, acompañada de SuperPepo, que nos viñeron contar unha historia moi interesante sobre valores como a solidariedade, a xenerosidade, a xustiza, a empatía, a resolución de conflictos... Superpepo trouxo moitas pegatinas, papeis máxicos con sementes no seu interior, historias cheas de ensinanzas de nenos e nenas de África (Congo) e Latinoamérica (Ecuador), preguntas interesantes que nos fixeron pensar e ata un espello máxico no que si conseguías verte reflexado poderías convertirte nun superheroe ou nunha superheroína.

    Encantounos a visita de Miriam e de SuperPepo. Agora a ver se conseguimos nós ser auténticos superheroes da SOLIDARIEDADE e se desenvolvemos os superpoderes de ter imaxinación para poder voar, saber escoitar, decir sempre a verdade, poder ver cando alguén nos necesita e axudar aos demais.