DÍA DAS LETRAS GALEGAS

  O 17 de maio é un día importante para os galegos e galegas. É un día sinalado para homenaxear á nosa lingua, o galego, e a todas as persoas que o defenderon e o empregaron como vehículo de comunicación, expresión e creación. Esta data, 17 de maio, recorda o momento preciso en que se publicou o primeiro exemplar de Cantares Gallegos da escritora Rosalía de Castro dando comezo ao Rexurdimento.

 

   Este ano a autora homenaxeada foi Begoña Caamaño, escritora, xornalista e locutora de radio. Aínda que estudiou Maxisterio, a súa vida encamiñouse cara o xornalismo que lle permitiu mostrar o seu activismo social e político.  Foi unha muller moi comprometida cos principios feministas, defendendo sempre con enerxía a xustiza, a necesidade de visibilizar o papel da muller na sociedade e a obligatoriedade de loitar pola igualdade real entre homes e mulleres.

                          

  Na Pementeira elaboramos un mural coa imaxe de Begoña Caamaño, pintada polos nenos e nenas, rodeada das palabras que ela mesma empregou para autodescribirse. Ela afirmaba que era activa, inqueda, tenra, intensa, rebelde, fantasiosa e defínese como “artivista”, unha suma de artista e activista. Traballando en equipo fixemos un pequeno recoñecemento a esta muller valente, crítica e loitadora que tamén nos deixou dúas interesantes obras literarias, escritas na nosa lingua galega, nas que reinterpreta antigos mitos en clave feminista.

  Para os peques de 3-4 anos é moi complexo entender a trascendencia deste día para a cultura galega, e o valor de mulleres como Begoña Caamaño. Pero o que tratamos de facer é que vaian escoitando nomes, que vaian familiarizándose con imaxes, que vaian asumindo con naturalidade que as mulleres tamén son escritoras, son activistas e loitadoras e que deixan a súas pegadas na historia dun país, que vaian escoitando novas palabras que irán progresivamente integrándose no seu vocabulario... Son simplemente sementes que seguramente, se as regamos e coidamos, xermolarán e darán froitos.