MURAL UBUNTU POLA PAZ

      As actividades durante o curso 2020-2021 foron moitas e diversas. Intentamos participar en diferentes propostas do centro planificadas de maneira xeral sin especificar niveis, ou máis específicas de infantil así como, obviamente, das que foron xa plantexadas para este aula de maneira específica. Como a min me gustan de maneira especial todas as tarefas que teñen que ver coas artes, intento que os meus alumnos/as teñan ocasións nas que poidan experimentar coas diferentes formas de expresión artística, gústame que debuxen, que pinten, que fagan collage, que modelen, que constrúan con area, que bailen, que canten, que toquen instrumentos, que fagan teatro, que reciten poemas... en fin o que sexa que lles axude a mostrar e canalizar emocións. 

  Unha das actividades nas que infantil leva xa tres anos consecutivos participando é a realización dun mural  no patio para conmemorar o Día da Paz. Este ano foi máis complexo organizar todo o relativo á pintura do mesmo porque tiñamos que controlar moito os horarios para non coincidir coas clases de educación física do alumnado de primaria ou coas súas horas de recreo. Por outra banda, tivemos algún que outro inconvinte inesperado; cando íamos iniciar o mural tivemos un par de semanas de moi mal tempo e non podíamos saír, despois a preparación da parede retrasouse por un confinamento, despois a nosa aula tamén foi confinada, e a partir de aí xa empezamos a traballar intentando capear temporais, sol intenso e horarios difíciles de conciliar. Pero con todo, unha vez máis, todo o alumnado de educación infantil tivo oportunidade de saír e poñer a súa pinceladiña neste mural que homenaxea a Nelson Mandela e trata de facernos reflexionar sobre o importante que é unirnos, respectarnos e colaborar para lograr a paz.

   Se vos interesa ler un breve artigo sobre a importancia da educación artística nas escolas, déixovos aquí un enlace (clicade na palabra ARTE)

         ARTE

   E agora, aquí vos deixo as imaxes do traballo realizado polos pementeiros/as  xunto co resto do alumnado de infantil e os mestres e alumnado de primaria que se animaron a participar tamén.

  Esta actividade é un claro exemplo de que traballando en equipo podemos acadar resultados importantes. Pintar nesta parede de bloque non é sinxelo porque é moi porosa e moi irregular así que é complexo facer un debuxo ben perfilado e, tamén, encher ben de cor a superficie. Por outra banda os utensilios dos que dispoñemos tampouco son os máis axeitados para a decoración mural. Así que o traballo destes pequenos de infantil é digno de ter en conta, esforzáronse en traballar e en axudar a que este patio sexa máis "UBUNTU". Síntome moi orgullosa de que o equipo de infantil sempre participe en todo tipo de actividades que propoñen os diferentes equipos do centro (aínda que non sexan aparentemente as máis adaptadas a estes pequenos, sempre se busca a maneira de que experimenten e colaboren ao seu nivel en todo tipo de propostas, como neste caso concreto).

    O importante, en definitiva, é facer unha homenaxe a aqueles homes e mulleres que loitaron pola paz, inculcar nos nenos e nenas o valor do traballo colaborativo, promover a reflexión sobre valores éticos e morais e facer do cole un lugar un pouco máis atractivo trastocando as tristes superficies grises de bloques, cemento e humidade en paneis cheos de cores. Eu sempre defenderei que os centros escolares teñen que ser alegres e estar cheos de imaxes e mensaxes edificantes porque aquelo que nos entra polos ollos tamén deixa unha pegada na nosa mente.

    Eu penso que o patio luce máis así que con grises paredes de bloques. E vós, ¿qué opinades? Agora nestas paredes tamén hai pinceladas de pementeiros/as. 

¡Qué bonito o proxecto deste curso!