CORPO E MENTE SANS

    Seguimos traballando co noso corpo e a nosa mente porque na Pementeira temos tempo para todo se nos organizamos ben. O mércores fixemos a nosa sesión de ioga e o xoves unha sesión literaria.

    Na sesión de ioga intentamos traballar os estiramentos de pernas e brazos. Aos nenos e nenas pequenos cóstalles estirar ben os músculos, teñen tendencia a ter xeonllos e cóbados un pouco flexionados, así que aí andamos, estirando ben todos os músculos e as articulacións. Por outra banda intento que se concentren na percepción do seu corpo, que se conecten coas diferentes sensacións corporais e que traballen a resistencia, porque neste grupiño costa traballo facer algo durante un tempo, todo o queren facer correndo e inmediatamente facer outra cousa diferente. É bastante normal que pase iso porque a impulsividade domina as accións dos cativos/as, pero a concentración, a paciencia, o control da impulsividade tamén se traballa, con práctica diaria. Ás veces quéixanse de que lle doen as pernas, ou os brazos, resoplan e deixan de facer unha posición rapidamente e, despois, dous minutos máis tarde xa a queren repetir e cando volvemos para a aula van falando das posicións que máis lles gustaron e do ben que o pasaron. Porque. certamente, cando practicamos ioga podemos sentir certas molestias  porque hai músculos cos que nunca traballamos, porque estamos habituados a malas posturas, porque non temos moito equilibrio ou flexibilidade e, sin embargo, inmediatamente despois da práctica xa empezamos a sentirnos mellor que antes e por iso temos ganas de seguir practicando. E parece que xa hai nenos e nenas que están animando ás mamás e papás a practicar tamen así que ¡xenial!

   Mirade ben porque xa hai algunhas posicións moi logradas e só levamos dúas clases. Veredes no mes de xuño!!!!!!

•           E hoxe fixemos unha sesión de lectura. Cada subgrupo tiña un lote de libros que podía "ler" despois de desinfectar as mans. Tras finalizar limpamos os libros que pasan a un estante apartado no que estarán como mínimo 24 horas antes de volver a empregalos. Con frecuencia tamén limpamos as mesas, puzles etc. para evitar posibles contaxios. É un pouco molesto ter que estar constantemente limpiando e desinfectando pero a outra opción posible é retirar todos os materiais da aula para non tocar nada e así non ter ningún risco, pero a verdade é que temos que afrontar todo isto con prudencia, por suposto, pero tamén con un pouco de sentido común e optimismo. No cole, e na vida en xeral, temos que procurar facendo cousas que nos axuden a manter tanto o corpo como a mente en plenas facultades. Así que toca limpar e limpar e limpar, e no medio ler, escribir, debuxar, bailar, cantar, xogar e practicar ioga.
•