IOGA E UN DRAGÓN VERMELLO

    O luns tivemos a nosa sesión semanal de ioga. Fixemos unha asana un pouco difícil e outra moi faciliña para compensar. O importante non é lograr a perfección no primeiro intento, o que temos que conseguir é ser pacientes e intentalo cada día para ir avanzando. Veredes nas fotos que xa hai moitos nenos e nenas que se están esforzando e logran boas posicións. Aí estamos, intentando facer cousas novas e diferentes, procurando perder medos, e tratando de traballar o noso corpo e a nosa mente.

Postura do barco: Navasana

   Postura do guerreiro 2. Neste caso só fixemos unha aproximación, un primeiro paso cara a postura final, para ir pouco a pouco.

  E rematamos cunha posición moi faciliña para relaxarnos e descansar porque había cansancio no grupo. Así que a última asana foi a do bebé: Balasana. É unha posición de descanso, boa pra cando hai dor de espalda pero tamén cando hai estrés ou nerviosismo, relaxa o noso corpo e a nosa mente e se a practicamos antes de acostarnos, axúdanos a dormir mellor.

   É curioso que, ás veces, cando estamos practicando, algúns nenos e nenas protestan e din que queren descansar e que non poden facer algunhas asanas e, despois, cando xogan ou mesmo noutros momentos na xornada escolar (hoxe por exemplo cando rematamos o conto e íamos a sentarnos nos equipos, algunha pementeira estaba na alfombra practicando ioga).

  Despois de relaxarnos bailamos dúas veces o Hoky-Poky que lles gustou moito a case todos/as (por iso o bailamos dúas veces, pediron repetición) pero non teño imaxes básicamente porque eu tamén estaba bailando con eles para que souperan o que tiñan que facer. A ver se pronto volo podemos mostrar.

   

   Ademais de tarefas menos agradecidas (como poñer mandilóns ou recoller xoguetes, merendas etc. que non son as preferidas dos pementeiros/as) tamén traballamos outras cuestións. Cada día contamos cantos nenos e nenas hai no cole, vemos quen non está, imos mirando as iniciais dos nomes, o día da semana... e pouco temos que ir identificando os primeiros números e algunhas letras. Tamén escoitamos contos como "O dragón vermello" ou "A galiña roxa" que gustaron moito e ata pintamos con pincel un dragón que quedou fantástico.

  

 

                                       

                                         

   E agora, aquí están os dous últimos pementeiros/as que levaron a Galopín a casa . Espero que o disfrutaran moito. Dixéronme que dormiran con el e que non roncara nin lles fixera pis na cama.