RITMO E CORES

      Esta semana, na Pementeira, estivemos moi animados e moi activos. Xa sabemos que houbo moita xiada polas mañáns, pero... ¿quen dixo frío? nós  sabemos ben como podemos activar o noso corpo para entrar en calor e empezar o día con moita enrxía e bo humor. Cantamos e bailamos xuntos e así pasámolo ben, aprendemos inglés, traballamos a atención e a coordinación, melloramos o sentido do ritmo e  creamos un sentemento de equipo para estar a gusto no cole e traballar con máis ilusión.

                                  

  

   A música está sempre presente na Pementeira. Cando é posible, gústanos facer certas tarefas con música de fondo. Os nenos e nenas de vez en cando pídenme unha ou outra canción. Por exemplo o "Nocturno" de Chopin, "Aire" de Bach ou "Imagine" de Lennon. Pouco a pouco, vou introducindo músicas diferentes, de culturas máis ou menos lonxanas a nós, de épocas distintas, máis ou menos lentas ou movidas, fomentando na medida que podo o achegamento a un repertorio o máis variado posible para ir descubrindo qué estilos lles gustan máis, ou qué melodías lles axudan máis a relaxarse ou activarse... Encántame ver a súa evolución, por exemplo coa música clásica que, ao principio, parece que non lles atrae moito pero co paso do tempo xa a van integrando e, de feito, xa a piden eles/as.

                                  

   Estamos facendo unha actividade para conmemorar o Día da Muller. Coa intención de recoñecer a importancia das mulleres ao longo da Historia, tendo en conta que apenas se fala delas nos libros de texto (e memsmo nas aulas en moitos casos), elexín a unha artista ucraniana, María Prymachenko, unha pintora autodidacta e intuitiva, filla de campesiños, que desenvolveu un estilo cheo de cor, de debuxos simples que xogan co ritmo e as simetrías, e que buscaba alegrar ao espectador. Ela dicía que pintaba flores e paxaros porque eran cousas que alegraban á xente. A invasión rusa en Ucrania está provocando perdas terribles en todos os sentidos, principalmente en vidas humanas e en liberdades, pero tamén en cultura. En 2022 un bombardeo ruso destruiu o Museo onde se atopaban as obras de María Prymachenko, de esta maneira non só se ataca a arte, a producción dunha artista en concreto, senón tamén se produce un ataque directo ás tradicións ucranianas e á súa memoria. Destruíndo as expresións artísticas e culturais dun pobo, destrúese a súa identidade, a súa idiosincrasia, a súa historia... o que nos define como seres humanos e como pobos. Por iso, tiña ganas de facer unha actividade que unira a conmemoración do Día da Paz e o Día da Muller, presentando a esta artista e a súa obra. Xa vos irei mostrando máis cousiñas. Pero, ata o de agora, aquí vos deixo uns paxaros cheos de cores.

                                 

    Aileen marchou moi contenta co "Libro dos nomes". Espero que o disfrute moito na casa coa familia. E Noa trouxo un libro moi interesante para o recuncho do Proxecto Egeria.