FEIRA DO LIBRO, IOGA, PIZARRA NOVA E LIBRO VIAXEIRO

     Onte, martes 24, tivemos a oportunidade de visitar na biblioteca do centro unha pequena feira do libro na que aproveitamos para mercar algún exemplar que pasou a enriquecer a nosa biblioteca de aula. A estes pementeiros e pementeiras xa lles encanta o simple feito de facer algo diferente e saír da aula, e subiron ao segundo andar do cole coa mesma ilusión coa que van de excursión. Estiveron mirando os libros expostos con interese e con ganas de mercalos todos, pero finalmente eliximos 5 e algúns nenos e nenas xa lle botaron o ollo a outros e foron mercalos con mamá e papá pola tarde.

                                     

                                       

       É xenial ver o interese dos máis pequenos por ter libros, por mergullarse nas súas páxinas, escoitar ou ler xa as historias que encerran... Esperemos que nunca perdan ese gusto polos libros e sigan tendo ganas de ler a medida que vaian medrando. Tamén é certo que o noso exemplo é importante e que si nos ven disfrutar coa lectura é máis probable que eles/as sintan ese interese, e si poñemos ao seu alcance libros fermosos e interesantes seguramente desenvolverán un amor polos libros que facilmente se manterá no tempo.

   Despois, cando regresamos á aula levamos unha sorpresa porque tíñamos colocada a nosa nova pizarra de rotus e magnética  e xa a estrenamos cuns debuxos.

   O venres tivemos a nosa sesión semanal de ioga e estivemos facendo tres tipos de plancha, frontal, lateral e invertida. Son posicións que requiren esforzo, concentración e atención, hai que colocarse ben, manter o estiramento das extremidades e do torso, manter o equilibrio e ter forza nos brazos, nas pernas e nos músculos abdominais. Teño que dicir que houbo nenos e nenas que lograron unhas posturas casi perfectas. Costa traballo pero a satisfacción cando se logra algo difícil tamén é máis grande.

      Hoxe a encargada, Clara Torreira, levou a casa un pequeno libriño coas rimas dos ríos que estivemos traballando (e coas que elaboramos un vídeo que agora atmén está colgado na páxina web do centro).  Mañán xa o traerá de volta para que o poida levar o seguinte encargado/a e vos poida recitar ese versiños coas imos coñecendo algúns ríos e algunhas curiosidades dos mesmos.

     ¡Mirade que contenta vai Clara! Esperemos que todas/os vaian os próximos días así de felices tamén.