Hoxe luns xa tivemos unha xornada escolar un pouquiño máis longa así que fixemos máis cousiñas. Empezamos cantando unhas cancións iniciais, de acollida e saúdo, contamos un conto dunha tartaruga tímida que lles gustou moito a todos/as, fixemos puzles, recordamos o poemiña do cabaliño Galopín, merendamos e xogamos coas construccións un pouquiño e ata bailamos de novo a canción do Polo Pepe.
Ademais de facer diferentes actividades, empezamos a practicar certas rutinas como colocar a mochila e o abrigo no percheiro, coller a merenda, merendar sentados, tirar as cousas nas cubetas axeitadas (orgánico, papel e plástico), recoller as merendas e os diferentes xogos, facer filas para sair en orden... Son moitas cousiñas e hai que ir repetíndoas cada día para que os nenos e nenas as vaian interiorizando e automatizando de maneira que cada día que pase será moito máis sinxelo e rápido facer todo isto. Certamente hai quen se frustra rapidamente e si non consigue algo no primeiro intento xa se enfada ou deixa de facelo, é bastante normal a estas idades, pero temos que insistir un pouco para que vaian asumindo pequenas frustracións no día a día e vaian descubrindo todo o que son capaces de facer a medida que o intentan e o practican repetidamente.
A pesar destes pequenos momentos de enfados por non conseguir algo no momento exacto en que o querían, a mañán transcurriu con moita tranquilidade e normalidade. Moitos nenos e nenas xa se mostraron bastante autónomos, con ganas de facer cousas por si mesmos e moi satisfeitos cando lograban superar un pequeno reto e iso é estupendo.
Mirade as fotos e veredes como dá gusto velos na aula (a pesar de que haxa algún pequeno drama para entrar). Imos dando pequenos pasos cada día.
No hay comentarios:
Publicar un comentario