CONTACONTOS E DÍA DO NENO

    Como xa sabedes o noso proxecto anual BLABLALANDIA xira en torno á importancia da palabra na educación dos nenos e nenas. O valor da literatura oral, das recitacións que escoitamos e memorizamos desde pequenos de xeito lúdico, e dos contos que son canles de transmisión de valores, tradicións e cultura. Compartir cos máis pequenos momentos nos que xogamos coa linguaxe recitando poemas, facendo rimas divertidas, contando historias que os fan voar polo universo da imaxinación é  algo profundamente valioso, non só porque aprenden vocabulario e estructuras morfosintácticas senón porque senten emocións, establecen conexións profundas con outras persoas, acceden a gran variedade de contidos de todo tipo, abren os ollos a realidades moi diferentes á súa e empezan a pensar, a reflexionar, a xerar ideas propias.

 A narración dun conto é unha rutina de aula en infantil. Cada mañán lemos un conto e falamos un pouquiño sobre el. O pasado luns 17 de novembro en vez de escoitar o conto na nosa aula, tivemos a sorte de facer algo un pouquiño distinto. Todo o alumnado de infantil ocupou a aula de psico para recibir a dous narradores, a profe Salomé e Miguel (un profe de música doutro cole) acompañados dun acordeón. Ambos contaron e cantaron un simpático conto dun lobo larpeiro que quería cear algo máis cunha simple sopa de verduras.

  E o xoves 22 de novembro fixemos unha sinxela actividade para conmemorar o Día Mundial da Infancia. É un día importante para facer fincapé na importancia de traballar na protección da infancia, en especial daqueles nenos e nenas que viven en situacións de máis vulnerabilidade. Na aula estivemos falando da sorte que temos porque contamos cunha familia que nos protexe e nos quere, temos roupa, casa e comida, xoguetes e medicamentos cando os necesitamos, hai moita xente que nos coida no cole e noutros lugares como os hospitais por exemplo. Pero hai nenos e nenas que non teñen tanta sorte, viven en lugares nos que hai guerra, ou nos que hai pobreza, non teñen casa ou familia, teñen fame ou frío, non poden ir ao cole  nin xogar nun parque... E este día 20 de novembro queremos acordarnos deles e facer un mural cheo de cores coas pequenas mans de cada neno e nena de infantil simbolizando a unión e tamén a individualidade de cada un/ha. Todos somos iguais e todos diferentes. Todos fortes e dispostos a cambiar o mundo.