FOLLAS DE OUTONO

     O outono sempre nos produce un pouquiño de tristeza porque supón o remate do verán que tanto nos gusta, e a proximidade do frío inverno que, normalmente, nos invita a quedar na casiña máis tempo. Pero a verdade é que o outono ten unha beleza que ´difícil de superar. Se nos animamos a dar un paseo por un bosque podemos ver unha chea de cores intensas, de xogos de luces  e sombras, de camiños alfombrados de follas secas que non nos poden deixar indiferentes.

   As follas do outono poden mostrarnos unha variedade de tonalidades de amarelos, laranxas, vermellos, marróns, verdes e mesmo morados ou violetas que fan que calqueira fotografía pareza unha verdadeira obra de arte. 

   Así que estes días nós quixemos probar a pintar as nosas follas de outono con todas esas cores intensas. E tamén experimentamos unha nova técnica de pintura que consiste en dar toques de cor (colocando o pincel en vertical) de xeito libre polo debuxo. As cores non as mesturamos antes de pintar senón que se van colocando unhas á beira das outras dando eses  pequenos toques co pincel de xeito que interactúan unhas coas outras pola proximidade ou ben porque se mesturan directamente no papel.  Esta técnica é máis ou menos similar á empregada polos pintores postimpresionistas (o divisionismo e o puntillismo por exemplo). Así que como vedes imos probando cousas, experimentando, tratando de deixarnos levar pola actividade de xeito espontáneo e natural a ver que resultado podemos obter..

     Mirade a ver que vos parece esta experiencia pictórica. A min paréceme que foi bastante productiva.

    E como tivemos uns días moi pictóricos, tamén lemos un libro moi artístico, un conto baseado na vida dun xenial pintor que a min me encanta: Vincent van Gogh.