PERSONALIDADES UBUNTU: GANDHI

     Hoxe toca falar doutra grnade personalidade da historia da humanidade: Gandhi. Un loitador pola independencia da India fronte ao colonialismo británico e defensor da paz e da non-violencia.

   Julia preparou na casa unha presentación sobre este home que tivo unha vida complexa, chea de acontecementos e que ela nos explicou con moito detalle, a verdade.

   Teño que felicitar a Julia e á súa familia porque non é fácil contar todo o periplo vital de Gandhi que viviu unha época tamén moi complexa políticamente. Así que todo ese esforzo para resumir a súa vida contando os momentos máis significativos e mesmo contextualizando cada un deles no mapa ben merece unha felicitación.

 

   E, como ben sendo habitual, fixemos unha ficha recollendo algúns datos significativos sobre Gandhi.

   ¡Veña! A ver se alguén máis se anima a investigar sobre algunha figura importante da Historia que poidamos englobar nese concepto Ubuntu. Aos nenos e nenas gústalles moito mostrar o que fixeron nas casas e tamén disfrutan vendo aos compañeiros/as explicando as cousas na PDI. Despois cando falamos todos, é certo que hai conceptos e datos que lles resultan complexos e poden mesturar ou esquecer pero tamén hai un montón de información que recordan e que lles chama a atención e lles parece interesante.

     Pensade que cando estades facendo estas presentacións, estades reforzando moitísimas cousas: a atención, a memoria visual e auditiva, a expresión oral, a conexión entre  conceptos, a autonomía, a superación de retos, a responsabilidade... por non falar da adquisición de valores éticos e morais, e o achegamento a coñecementos diversos que sentan as bases de aprendizaxes posteriores que teñen moito que ver coa formación cultural. A cultura é algo que nos define como seres humanos e estamos facendo que todos estes nenos e nenas se acheguen con naturalidade a conceptos científicos, históricos, sociais, xeográficos, filosóficos...